Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 45.77 | Dem. 45.81 (English) | >>Dem. 45.84 |
45.80εἶτα τοιαῦτα ποιῶν καὶ τηλικαύτας μαρτυρίας ἐξενηνοχὼς τῆς ὕβρεως τῆς σαυτοῦ σύ , τὸν ἄλλου του βίον ἐξετάζειν τολμᾷς ; μεθʼ ἡμέραν εἶ σὺ σώφρων , τὴν δὲ νύκτʼ ἐφʼ οἷς θάνατος ἡ ζημία , ταῦτα ποιεῖς . πονηρός , ὦ ἄνδρες Ἀθηναῖοι , πονηρὸς οὗτος ἄνωθεν ἐκ τοῦ Ἀνακείου καὶ ἄδικος . σημεῖον δέ · εἰ γὰρ ἦν δίκαιος , πένης ἂν ἦν τὰ τοῦ δεσπότου διοικήσας . νῦν δὲ τοσούτων χρημάτων τὸ πλῆθος κύριος καταστὰς ὥστε τοσαῦτα λαθεῖν ἀπʼ αὐτῶν κλέψας ὅσα νῦν κέκτηται , οὐκ ὀφείλειν ταῦτα , ἀλλὰ πατρῷʼ ἔχειν ἡγεῖται .
45.81καίτοι πρὸς θεῶν , εἰ κλέπτην σʼ ἀπῆγον ὡς ἐπʼ αὐτοφώρῳ εἰληφώς , τὴν οὐσίαν ἣν ἔχεις , εἴ πως οἷόν τʼ ἦν , ἐπιθείς σοι , εἶτά σʼ ἠξίουν , εἰ μὴ φὴς ὑφῃρημένος ταῦτʼ ἔχειν , ἀνάγειν ὅθεν εἴληφας , εἰς τίνʼ ἂν αὔτʼ ἀνήγαγες ; οὔτε γάρ σοι πατὴρ παρέδωκεν , οὔθʼ ηὗρες , οὔτε λαβών ποθεν ἄλλοθεν ἦλθες ὡς ἡμᾶς · βάρβαρος γὰρ ἐωνήθης . εἶθʼ ᾧ δημοσίᾳ προσῆκεν ἐπὶ τοῖς εἰργασμένοις τεθνάναι , σύ , τὸ σῶμα σεσῳκὼς καὶ πόλιν ἐκ τῶν ἡμετέρων σαυτῷ κτησάμενος καὶ παῖδας ἀδελφοὺς τοῖς σεαυτοῦ δεσπόταις ἀξιωθεὶς ποιήσασθαι , παρεγράψω μὴ εἰσαγώγιμον εἶναι τὴν δίκην τῶν ἐγκαλουμένων χρημάτων ὑφʼ ἡμῶν ;
45.82εἶτα κακῶς ἡμᾶς ἔλεγες καὶ τὸν ἡμέτερον πατέρʼ ἐξήταζες ὅστις ἦν ; ἐφʼ οἷς τίς οὐκ ἄν , ὦ ἄνδρες Ἀθηναῖοι , χαλεπῶς ἤνεγκεν ; ἐγὼ γάρ , εἰ πάντων τῶν ἄλλων ὑμῶν ἔλαττον προσήκει μοι φρονεῖν , τούτου γε μεῖζον οἶμαι , καὶ τούτῳ γʼ εἰ μηδενὸς τῶν ἄλλων ἔλαττον , ἐμοῦ γʼ ἔλαττον · ὄντων γὰρ ἡμῶν τοιούτων ὁποίους τινὰς ἂν καὶ σὺ κατασκευάσῃς τῷ λόγῳ , σὺ δοῦλος ἦσθα .
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 45.77 | Dem. 45.81 (English) | >>Dem. 45.84 |